Eth Govèrn dera Generalitat promò demiei es sues accions de mobilitat sostenibla eth Burèu dera Biciclèta. Ei eth Departament de Territòri e Sostenibilitat dera Generalitat de Catalonha qu’acuelh dempús 2007 es reünions deth Burèu dera Biciclèta, un grop pera participacion de totes es organizacions, federacions, associacions d’usatgèrs, enterpreses deth sector e diuèrses entitats publiques coma dera societat civiu, restacades ath mon dera biciclèta.

Eth burèu dera Biciclèta s’amasse cada 2-3 mesi damb era tòca d’abordar amassa eth melhorament des politiques de promocion der usatge dera biciclèta. En particular, entre d’auti aspèctes, es restacadi damb era planificacion, execucion e senhalizacion de pistes ciclables, era nòrma e regulacion der usatge dera biciclèta, era seguretat viària, era intermodalitat damb eth transpòrt public e estudis especifics sus eth sector. Eth Burèu dera Biciclèta a impulsat diuèrsi congrèssi adreçadi a diuèrsi camps que tòquen ath sector. Recentaments eth Departament de Territòri e Sostenibilitat arrecebec deth Burèu dera Biciclèta eth mandat d’amiar a tèrme un cincau Congrès, centrat ena mobilitat sostenibla e eth ciclotorisme e es sues potencialitats coma motor economic, restacat a ua activitat respectuosa damb era natura e que permet era participacion equilibrada de tot eth territòri catalan.