PACTE NACIONAU DE SALUT
Participa en la transformacion del Sistèma de Salut de Catalonha. Participa en el Pacte Nacionau
Quant a aquest procés
Aquest procés pertany a Procés
Presentacion
Es cambiaments sociodemografics, epidemiologics, tecnologics e era madeisha demanda dera societat hèn de besonh transformar eth sistèma sanitari entà assegurar-ne es resultats en salut demorada, e tanben era sua sostenibilitat.
Entà amiar a tèrme aguesta transformacion son de besonh estrategies de long recorrut damb accions diuèrses e complèxes que demanaràn temps entà planificar-les e executar-les, e que van ath delà des cicles de govèrn, e tanben eth compromés entre es diferenti agents que i an influéncia. Per aguesta rason, se considère de besonh hè'c a trauès d’un Pacte Nacionau de Salut.
Damb eth Pacte tanben se vò arténher eth quadre d’estabilitat de besonh entà auançar en bastiment d’un sistèma de salut orientada entàs objectius de desvolopament sostenible (ODS) dera Agenda 2030, a on era salut dera poblacion ei un indicador de progrès comun.
Eth Pacte serà eth resultat dera volontat e eth compromés de toti es agents implicadi, politicament e sociaument, e deth sector de salut pròpriament, entà desplegar es estrategies, accions e cambiaments de besonh damb er objectiu d’arténher era maxima salut dera poblacion de Catalonha de forma sostenibla.
Ei, donques, un projècte de país que demane eth debat e es acòrds entre toti es agents implicadi: ciutadanetat, organizacions, professionaus e fòrces politiques.
Aguest procès nèish damb era volontat d’identificar es elements de valor deth sistèma actuau entà assolidar-les e enfortir-les, e acordar es cambiaments de besonh entà auançar ena transformacion deth sistèma, en tot pensar en futur.
Descripcion
Damb er objectiu de crear un entorn deliberatiu entath bastiment des elements deth Pacte, s’a constituït er espaci deth Pacte Nacionau de Salut format per 45 agents damb influéncia en sistèma de salut, coma son es entitats ciutadanes, es corporacions professionaus, es sindicats, es organizacions sanitàries, es societats dera coneishença, es grops parlamentaris, es entitats municipalistes, e de d'auti departaments dera Generalitat de Catalonha.
Aguesti agents concretaràn aquerò que fin finau harà part deth Pacte Nacionau de Salut, e ac haràn per miei de sessions deliberatives entre abriu e mai deth 2024.
Entà podé'c hèr damb garentides, resulte de besonh neurir er Espaci deth Pacte d’evidéncia, experiéncia professionau e participacion ciutadana. Calerà dispausar, donques, des següentes hònts d’informacion:
· Eth Document d’Analisi e eth Document de Bases deth Pacte Nacionau de Salut, que s’an elaborat d’acòrd damb era revision bibliografica des principaus documents qu'enes darrèri ans an analisat diferenti sistèmes de salut e qu'an indicat prepauses entara sua transformacion. E, tanben, d’acòrd damb es aportacions de persones expèrtes en diferenti airaus e disciplines que s’an recuelhut en sessions deliberatives grupaus e entrevistes ath torn de sèt dimensions: sistèma de salut, professionaus, governança, sostenibilitat, avaloracion, recèrca e innovacion, e transformacion digitau.
En aguest document, elaborat entre junh e deseme deth 2023, i figuren tretze escomeses que s’an identificat coma prioritàries e que cau abordar. Tanben seishanta ueit accions recomanades, que se considèren indispensables entà dar responsa as escomeses e que requeriràn d’un acòrd ample.
· Era interlocucion damb diferenti espacis e conselhs assessors en relacion damb tèmes especifics, coma era recèrca e era innovacion o era perspectiva de genre, entre de d'auti.
· Un procès participatiu damb ciutadanetat de sòrta individuau e collectiva sus es accions recomanades. Aguest procès s'amiarà a tèrme de forma telematica en portau participa.gencat.cat, deth 23 de gèr ath 23 de hereuèr de 2024.
Objectiu deth procès participatiu
Damb aguesta iniciativa participativa damb era ciutadanetat de sòrta individuau e collectiva, se vò conéisher, d'un costat, eth grad d’acòrd e era importància per repòrt des accions recomanades, includides en Document de bases. Der aute, se vòlen recuélher de d'autes accions que siguen importantes entath Pacte e que non s’agen recuelhut en Document de bases.
(Entà mès informacion, vos podetz adreçar ar espaci web deth Pacte Nacionau de Salut de Catalonha)
Com podetz participar-i?
A trauès d’un qüestionari a on i trobaratz es escomeses e es prepauses d’accions recomanades en Document de bases deth Pacte, entà que consideretz enquia quin punt i ètz d’acòrd e coma de importants consideratz que son.
Ara fin deth qüestionari, tanben poderatz ahíger aqueres accions que i trobatz a mancar, enquia un maxim de 3.
Ara ora de hèr es vòstes prepauses d’accion, cau que tengatz en compde es observacions següentes:
- Entà hèr mès factible eth desplegament deth Pacte, calerà limitar eth nombre d’accions que fin finau s’i includisquen.
- Cau que hetz es prepauses d’accions:
- A compdar d’un punt d'enguarda d’aquerò qu'ei de besonh entath futur deth sistèma de salut, ei a díder, a compdar de d’ua perspectiva transversau ath delà dera vision personau e/o de representacion d’un collectiu especific.
- En tot enfaciar en “Qué?”, ei a díder, qué consideratz de besonh incorporar entà hèr possible es transformacions que requerís eth sistèma de salut.
Entà que se tenguen en compde, es accions que prepausetz non pòden hèr referéncia a tèmes personaus, restacades, per exemple, damb un procès de malautia, o especifiques, per exemple, sus un servici assistenciau o un centre sanitari.
Entà poder mandar consultes, suggestions e queishes d’aguest tipe, dispausatz dera boèta de contacte per internet deth CatSalut, eth CatSalut en territòri e eth pròpri centre sanitari.
Com s’a dessenhat eth qüestionari?
Entà recuélher era vòsta opinion, cau que entretz en espaci “Qüestionari per a ciutadania individual” o a l'espai "Qüestionari per a col·lectius / entitats".
Eth temps estimat entà responer-lo ei de 45 menutes, e cap des qüestions, exceptat es 5 iniciaus, ei de responsa obligatòria.
Dempús des qüestions descriptives iniciaus, trobaratz era prumèra des tretze escomeses.
En caduna des escomeses, poderatz:
1. Conéisher era escomesa e es accions recomanades entà abordar-la, que s’an obtengut d’acòrd damb era revision bibliografica e era participacion de professionaus expèrts (sessions grupaus e entrevistes).
2. Avalorar eth grad d’acòrd damb es accions recomanades. Vos prepausam ua grasilha a on poderatz especificar, entà cada accion, se i ètz totaument d’acòrd, fòrça d’acòrd, pòc d’acòrd o totaument en desacòrd.
3. Avalorar era importància des accions recomanades. Vos prepausam ua grasilha a on poderatz especificar, entà cada accion, se la consideratz fòrça important, pro important, pòc important o bric important.
En cas que trobetz a mancar quauqua accion, ara fin deth qüestionari poderatz prepausar-ne enquia 3 de naues.
Qué se’n harà d’aguesta participacion?
Un viatge finalizada era iniciativa participativa, s’elaborarà un Document resumit dera participacion ciutadana damb era informacion que s’obtengue dera espleitacion des responses, tant a nivèu quantitatiu coma qualitatiu, que se publicarà en aguest madeish espaci.
D’un aute costat, aguesta informacion se transmeterà as integrants der Espaci deth Pacte Nacionau de Salut entà que la tenguen en compde ara ora de discutir coma s’acabe definint eth pròpri Pacte.
Eth Document resumit dera participacion recuelherà totes es prepauses?
En cas que se produsisque ua nauta participacion, pòt èster que diferentes prepauses tracten ua tematica comuna. Deuant d’aguesta ipotèsi, era informacion se poderà presentar de forma agregada e/o resumida en Document resumit dera participacion e, donques, non s’i includirà era literalitat de çò que responéretz.
Qué non se recuelherà en Document resumit dera participacion?
Non s’i includiràn:
· Contenguts que hèsquen referéncia a casi e/o tematiques particulares.
· Accions recomanades en relacion damb un servici assistenciau e/o centre sanitari especific.
· Aportacions que non hèsquen referéncia ara prepausa d’incorporacion de tematiques/accions ath Pacte Nacionau de Salut.
Compartís: