Consulta publica prealabla en relació der Avantprojècte de lei des instruments de provision deth sistèma public de servicis sanitaris

Es servicis sanitaris en Euròpa, coma servicis d’interès generau, non se considèren activitats economiques e es estats membres (d’acòrd damb era distribucion intèrna de competéncies entre es diferentes administracions) son competents entà organizar-les. En aguest sentit, es directives sus contractacion publica establssen que non afècten ara libertat des estats membres entà definir, cossent damb eth dret dera Union, çò que considèren servicis d’interès economic generau e com s’an d’organizar e finançar aguesti servicis. Atau a estat recuelhut en article 11.6 dera Lei 9/2017, de 8 de noveme, de contractes deth sector public,   que dispòse qu’ei excludida d’aguesta Lei era prestacion de servicis sociaus entà entitats privades, tostemp que se pòrte a tèrme sense besonh de soscríuer contractes publics.

De un aute costat, era disposicion finau dusau dera Lei 5/2020, de 29 d’abriu, de mesures fiscaus, financères, administratives e deth sector public e de creacion der impòst sus es installacions qu’incidissen en miei ambient, establís eth manament en Govèrn de proposar ath Parlament un projècte de lei entà establir eth marc regulador dera gestion concertada de natura non contractuau entara prestacion de servicis sanitaris.

Actuaumen, era Lei 15/1990, de 9 de junhsèga, d’ordenacion sanitària de Catalonha (LOSC), ja recuelh qu’eth Servici Catalan dera Salut (CatSalut), entar exercici des sues foncions, pòt emplegar formules de gestion dirècta o formules de gestion indirècta que, entre d’autes, includissen er establiment d’acòrds, convènis, concèrts o formules de gestion integrada o compartida damb entitats publiques o privades.

D’acòrd damb aguest marc normatiu, s’a de valorar com articular era participacion des entitats sense interès lucratiu o que complisquen determinades condicions qu’establís era normativa europèa e promòir un sistèma de provision de servicis sanitaris que s’oriente a promòir era estabilitat e era qualitat assistenciau, coma factors decisius, damb er objectiu finau de plaçar as persones usatgères en èish vertebrador deth sistèma public de salut.

Tot açò, damb era volentat de consolidar eth Sistèma sanitari integrau d’utilizacion publica de Catalonha (SISCAT), especiaument en çò que hè ar actuau modèl de vinculacion des centres qu’intègren eth hilat d’intèrnament, d’acòrd damb es critèris ja establidi ena Lei generau de sanitat, pr’amor qu’er establiment de sistèmes de vinculacion a long tèrme permeten dotar ath sistèma dera continuïtat, estabilitat e integracion de recorsi sanitaris que requerís eth tractament dera salut dera ciutadanetat.

Per tot açò, es objectius deth projècte son adequar es formules de gestion ath principi de responsabilitat publica que regís es servicis sanitaris de cobertura publica, arténher procediments que permeten ua tramitacion mès eficaça e eficienta, garantir ua màger estabilitat deth sistèma public de salut e priorizar era qualitat assistenciau des servicis prestats as persones e era artenhuda d’objectius sociaus.