Consulta publica preliminara ara elaboracion d’un Projècte de decret peth quau se regulen es condicions e eth procediment d’acreditacion des comitès d’etica dera recèrca e des comitès d’etica dera recèrca damb medicaments

Objectius deth nau decret

Era Lei estatau 14/2007, de 3 de junhsèga, de recèrca biomedicau, que prevé era creacion des comitès d’etica dera recèrca (CER) e era desaparicion posteriora des comitès d’etica d’investigacion clinica (CEIC) amassa damb es cambis importanti en encastre legislatiu dera recèrca en Euròpa e en estat espanhòu, a representat ena practica qu’eth Decret 406/2006, de 24 d’octobre, peth quau se regulen es condicions e eth procediment d’acreditacion des comitès d’etica d’investigacion clinica (CEIC), sigue inaplicable.

A conseqüéncia d’aguesta situacion, en Catalonha, i a un vuet normatiu. Era manca de regulacion genère inseguretat juridica en moment de sollicitar era acreditacion d’un nau comitè o era sua renovacion e dificulte qu’es operadors poguen conéisher quin ei eth regim juridic que les ei aplicable, ath madeish temps que dificulte era supervision e eth contròl publics des projèctes de recèrca damb medicaments e productes sanitaris e investigacions biomedicaus.

D’un aute costat, eth Decret 406/2006, atribuís ath CEIC dera fondacion privada Centre de Medicina Regenerativa de Barcelona es foncions d’evaluar e informar determinadi projèctes d’investigacion en matèria de cellules mair. Atau madeish, actuaument, era Fundació Centre de Medicina Regenerativa de Barcelona, que hège aguest tipe d’estudis, a estat absorbida e extinguida pera Fundació Institut de Recerca Biomèdica de Bellvitge (IDIBELL).

Damb era intervencion dera Administracion dera Generalitat se vò resòlver es problèmes exposadi. En particular, es objectius que se vòlen arténher a trauès d’aguesta intervencion son:

• Aumentar era seguretat juridica en domeni des comitès qu’evaluen projèctes de recèrca damb medicaments e productes sanitaris e investigacions biomedicaus.
• Garantir de manèra efectiva era supervision e eth contròl publics des projèctes de recèrca damb medicaments e productes sanitaris e investigacions biomedicaus.
• Determinar qui a d’auer atribuïdes es foncions d’evaluar e informar determinadi projèctes d’investigacion en matèria de cellules mair en Catalonha, sigue damb era creacion d’un CER independent adscrit ath Departament, sigue assignant es foncions a un CER d’un centre de recèrca, com enquiath moment.

Er objectiu dera consulta ei remassar es aportacions, opinions, demandes, preocupacions e besonhs ciutadans e des diferenti collectius e sectors potenciaument afectadi en relacion damb era iniciativa normativa.