Consulta publica preliminara ara elaboracion d’un projècte de decret peth quau se regulen es servicis de supòrt ara inspeccion veterinària oficiau en auciders, sales d’espeçatge e establiments de manipulacion de caça en Catalonha.

En contèxte de Catalonha, es foncions e es condicions de formacion, d’abilitacion e d’autorizacion deth personau de supòrt ara inspeccion veterinària en auciders, sales d’espeçatge e magazèms frigorifics se regulèren mejançant eth Decret 138/2003, de 27 de mai, peth quau se regulen es foncions e es condicions de formacion, d’abilitacion e d’autorizacion deth personau de supòrt ara inspeccion veterinària enes auciders de Catalonha.

Maugrat aquerò, eth Decret 138/2003 se tròbe longament superat pera normativa comunitària, conformada peth Reglament UE 2017/625, de 15 de març, relatiu as contròls e d’autes activitats oficiaus hèti tà garantir era aplicacion dera legislacion sus aliments e neuriment entath bestiar, e des normes sus salut e benestar des bèsties, sanitat vegetau e productes fitosanitaris, e peth quau se modifiquen e deròguen diuèrsi reglaments comunitaris, e qu’a estat complementat, mejançant eth Reglament delegat (UE) 2019/624, de 8 de hereuèr de 2019, e eth Reglament d’execucion (UE) 2019/627, de 15 de març de 2019.

Damb era experiéncia aquerida en aguesti ans ena prestacion d’aguesti servicis de supòrt e assisténcia as veterinaris oficiaus (AIOV), e d’acòrd damb es referides disposicions especifiques comunitàries, er objectiu dera consulta qu’ei:

- Garantir era preservacion dera salut publica e era efectivitat deth contròl sanitari enes auciders, sales d’espeçatge e establiments de manipulacion de caça en Catalonha.

- Garantir era competéncia efectiva e era independéncia ena prestacion des servicis que hèn es auxiliars d’inspeccion veterinaris de supòrt as veterinaris oficiaus enes inspeccions ante mortem e post mortem.

- Garantir era seguretat juridica ena determinacion deth regim juridic en aplicacion.

Cambis que propòse eth nau decret

Era naua regulacion vò:

- Adaptar, en grana part, era actuau regulacion includida en Decret 138/2003, de 27 de mai, ja que se tròbe longament superada pera normativa comunitària en aquerò que hè referéncia as condicions de formacion e ath refortiment des foncions des AIOV d’assisténcia e supòrt des veterinaris oficiaus e qu’er article 18 deth Reglament (UE) num. 2017/625 les encomane en relacion damb foncions de contròl oficiau o de determinades foncions restacades damb d’autes activitats oficiaus.

- Cambiar eth modèl actuau de prestacion des servicis d’AIOV, basat ena contractacion administrativa, tà passar a regular un modèl d’entitats autorizades o abilitades qu’ei mès competitiu entar exercici normau dera libertat d’empresa e que garantís era independéncia e eth déuer de non-conflicte d’interèssi qu’exigís era normativa comunitària, ja qu’aguestes non mantieràn cap de ligam dirècte ne indirècte damb es operadors economics dera indústria dera carn.

- Crear un registre d’entitats abilitades, en contèxte dera Comunitat Autonòma de Catalonha, a on s’inscriueràn coma provedidores de servicis d’AIOV d’acòrd damb es condicions e es foncions que preven es reglaments comunitaris, entà qu’aguestes garantisquen un servici independent, efectiu, estable e contunhat de supòrt as veterinaris oficiaus, de manèra qu’es mesures de contròl e gestion entara prevencion des risqui derivadi entara salut umana deth consum d’aliment sigue tan pòc prejudiciau coma sigue possible, sense damnatge dera proteccion dera salut publica e d’acòrd damb er exercici dera libertat d’empresa.